Bakı Apellyasiya Məhkəməsində qəsdən sağlamlığa yüngül zərər vurmada təqsirləndirilən Cəmilə Mahmudovanın barəsindəki hökmdən verilən apellyasiya şikayəti üzrə məhkəmə prosesi başa çatıb.
Pravda.az-ın əldə etdiyi məlumata görə, hakim Zamin İbrahimovun sədrliyi ilə keçirilən prosesdə ittiham elan olunub.
İttihama görə, Bakı şəhərinin Xəzər rayonu, Qala qəsəbəsindəki evdə Cəmilə Mahmudova gəlini, zərərçəkmiş Maya Mahmudovaya qarşı fiziki zor tətbiq edib.
O, Mayanın baş və bədən nahiyələrinə əli ilə qəsdən zərbələr endirib.
Gəlinin aldığı xəsarətlər sağlamlığın qısa müddətə pozulmasına səbəb olub.
Xəzər Rayon Məhkəməsinin hökmü ilə Cəmilə Mahmudovaya 1000 manat məbləğində cərimə cəzası təyin edilib. Hökmlə razılaşmayan qayınana apellyasiya şikayəti verərək birinci instansiya məhkəməsinin qərarının ləğv olunmasını və barəsində bəraət hökmü çıxarılmasını xahiş edib.
Apellyasiya baxışı zamanı Maya Mahmudova məhkəməyə ərizə təqdim edərək təqsirləndirilən şəxslə barışdığını bildirib. Gəlin ərizəsində ona dəymiş ziyanın ödənildiyini qeyd edərək cinayət işi üzrə icraata xitam verilməsini xahiş edib.
Məhkəmə kollegiyası tərəflərin barışmasını, zərərin ödənilməsini və işin digər hallarını nəzərə alaraq apellyasiya şikayətini təmin edib.
Qərara əsasən, Xəzər Rayon Məhkəməsinin hökmü ləğv olunub.
Qeyd edək ki, adlar və soyadlar şərti verilib.
