Bakı Apellyasiya Məhkəməsi əzab vermə və satış məqsədilə külli miqdarda metamfetamin saxlamaqda təqsirləndirilən Yusif Məlikzadə və Adəm Tağızadənin (ad və soyadlar şərtidir) apellyasiya şikayətini təmin etməyib.
İttihama görə, hadisənin kökündə "TikTok"da zərərçəkmiş E. İbrahimovla "Elnur" adlı şəxs arasında yaranan mübahisə dayanıb. Təqsirləndirilən şəxslər məsələni "həll etmək" bəhanəsi ilə zərərçəkmişi avtomobilə mindiriblər.
İstintaqın məlumatına əsasən, avtomobil hərəkətdə olarkən Yusif Məlikzadə kəmərini zərərçəkmişin boynuna keçirərək onu boğmağa başlayıb, təhqir edib və ona fiziki ağrı, psixi iztirab verib. Bu zaman "Elnur" hadisəni "TikTok"da canlı yayımlayaraq zorakılığı internet istifadəçilərinə nümayiş etdirib.
Bundan başqa, hər iki şəxs satış məqsədilə ümumilikdə 8,236 qram metamfetamin saxlamaqda da ittiham olunub. Onlar Baş Mütəşəkkil Cinayətkarlıqla Mübarizə İdarəsinin əməkdaşları tərəfindən keçirilən əməliyyat zamanı saxlanılıblar.
Bakı Ağır Cinayətlər Məhkəməsinin hökmü ilə Yusif Məlikzadə 5 il, Adəm Tağızadə isə 4 il azadlıqdan məhrum edilib. Apellyasiya Məhkəməsi bu hökmü dəyişdirməyib.
mənbə: pravda.az
