“Ata tərəfdən Maştağalı, ana tərəfdən Fatmeyiliyəm. Amma meylim Fatmeyiyə daha çoxdur”.
Bunu apa.az-a müsahibəsində jurnalist, kinoşünas Aydın Kazımzadə deyib.
Aydın Kazımzadə hazırda tək yaşamağından danışıb: “Yoldaşımdan sonra tək qalmağa öyrəşmişəm. Yoldaşım sağ olaydı, sizi belə qarşılamazdım, evdə nə varsa, süfrəyə doldurardı. O, şuşalı idi”.
O, həyat yoldaşının beş il bundan qabaq, 79 yaşı olanda rəhmətə getdiyini bildirib.
Aydın Kazımzadə iki dəfə Mircəfər Bağırovu gördüyünü söyləyib: “Günlərin bir günü İsmailiyyə binasında Kənd təsərrüfatı işçilərinin respublika müşavirəsi keçirilirdi. Bizə ağ köynək, qara şalvar, pioner qalstuku geyindirib ora mahnı oxumağa apardılar. Adam əlindən tərpənmək olmurdu. Bir də gördüm ki, yuxarıdakı stolun arxasında eynəkli bir adam oturub. Əlində də çoxlu karandaş var, ovcunun içində tutub, ovuşdurur. Bizə qabaqcadan tapşırılmışdı ki, tədbirdə Mircəfər Bağırov da olacaq. Bir orda görmüşəm, bir də Filarmoniyanın bağında görmüşdüm. Gördüm Nazirlər Sovetinin qarşısı ilə aşağı düşür. Filarmoniya ilə üzbəüz Milli İncəsənət Muzeyi var, Bağırovun evi onun birinci binasında yerləşirdi. Gördüm əli dalında piyada gəzir. Biz də bağda idik”.
Kinoşünas “Aktyorlar arasında dostlarınız olmayıb?” sualının cavabında bildirib ki, mənim dostlarım rejissorlar idi: “Sürüşkəndirlər. Aktyorlar arasında möhkəm münasibətim olan adam olmayıb”.
Aydın Kazımov Azərbaycanın əfsanəvi aktyorları haqqında fikirlərini də bölüşüb: “Həsən Məmmədov aktyor deyildi, böyük insan idi. Onun əvvəl insanlığı vardı, sonra aktyorluğu, özü də kişi aktyor idi. Bir o idi, bir də Şahmar Ələkbərov. Şahmarla da çox yaxın olmuşuq. Şahmar da, Həsən də insan kimi əvəzsiz adam idilər”.
Kinoşünas Həsənağa Turabovu yekəxana adlandırıb: “Onunla aram yox idi, yekəxana idi. Mən həmişə deyirəm ki, sənətkarlara kənardan baxın, yaxına gedəndə pərişan olacaqsız. Rasim Balayev dövrümüzün böyük sənətkarıdır, amma mən xatirələr kitabımda onun haqqında tənqidi məqalə yazmışam”.
