Bakı Ağır Cinayətlər Məhkəməsində dələduzluqda təqsirləndirilən Emin Yusiflinin cinayət işi üzrə məhkəmə istintaqı başa çatıb.
Hakim Zaur Hacıyevin sədrliyi ilə keçirilən prosesdə hökm oxunub.
Emin Yusifli etibardan sui-istifadə etmə və aldatma yolu ilə özgənin əmlakını ələ keçirərək zərərçəkmiş şəxslərə külli miqdarda maddi ziyan vurmaqda ittiham edilib.
İttihama görə, o, tamah niyyəti ilə müxtəlif şəxsləri xırdabuynuzlu heyvanların alqı-satqısı ilə məşğul, geniş əlaqələrə malik olduğuna və onlardan aldığı pullarla müxtəlif rayonlardan heyvanlar alaraq satacağına, əldə olunan gəlirdən isə onlara qazanc verəcəyinə inandırıb.
İş materiallarına əsasən, təqsirləndirilən şəxs bu üsulla ilk olaraq 2024-cü ilin mart ayının əvvəllərində Bakı şəhərinin Xəzər rayonu, Şüvəlan qəsəbəsində tanış olduğu zərərçəkmiş Dadaş Mahalovdan 50 min manat alıb. Emin Yusifli eyni üsulla digər üç nəfərdən də külli miqdarda pul alıb. İttihamda onun avtomobil təmiri bağlı başqa bir şəxsi də aldatdığı qeyd olunur.
Beləliklə, Emin Yusifli yüz minlərlə manat vəsaiti dələduzluq yolu ilə ələ keçirib.
Təqsirləndirilən şəxsə Cinayət Məcəlləsinin müvafiq maddəsi ilə ittiham elan edilib.
Məhkəmə iclasında Emin Yusifli ona elan edilmiş ittiham üzrə özünü təqsirli bildiyini deyib.
Məhkəmənin hökmü ilə ona şərti cəza verilib və təqsirləndirilən şəxs məhkəmə iclas zalında həbsdən azad edilib.
Qeyd edək ki, ad və soyadlar şərti verilib.
Mənbə: pravda.az
