İri Şəhərlərin Birləşmiş Su Təchizatı Xidməti Hökməlinin bəzi ərazilərində suyun kəsilməsinə münasibət bildirib.
Xidmətdən sorğumuza cavab olaraq bildirilib ki, sözügedən ərazidə əhali tərəfindən fərdi qaydada çəkilmiş su xətləri yay mövsümündə su təminatında müəyyən çətinliklərin yaranmasına səbəb olur: "Bununla əlaqədar olaraq, ərazidə su təminatının yaxşılaşdırılması istiqamətində Regional Su Meliorasiya Xidmətinin tabeliyində olan Abşeron Su Meliorasiya Sistemlərinin İstismarı İdarəsi tərəfindən müvafiq işlər həyata keçirilir. Yaxın zaman ərzində yeni su anbarının istifadəyə verilməsi ilə su təminatı ilə bağlı yaranan çətinliklərin aradan qaldırılması nəzərdə tutulur. Məlumat üçün bildiririk ki, növbəlilik əsasında su təminatında çətinlik yaranan ərazilərdə yaşayan abonentlərin suya olan tələbatının qarşılanması məqsədilə su maşınları vasitəsilə su təminatı həyata keçirilir".
****
15:47
"Biz Hökməli qəsəbəsinin sakinləri olaraq artıq bir aydır ciddi su problemi ilə üz-üzəyik. Həftədə üç dəfə verilən su son indi ümumiyyətlə gəlmir".
Bunu Bakuplus.az-a müraciət edən Hökməli sakinləri bildiriblər.
Onların sözlərinə görə, hər həftə qəsəbənin müəyyən hissələrinin su təchizatı dayandırılır: "Nəticədə insanlar su maşınlarına üz tutmaq məcburiyyətində qalırlar. Hazırda 4 ton su təxminən 60 manata satılır. 4 ton su isə yayda cəmi bir neçə gün bəs edir".
Sakinlər deyirlər ki, qəsəbədə yollar uzun müddətdir bərbad vəziyyətdədir, yol probleminin üzərinə su probleminin əlavə olunması insanların gündəlik həyatını daha da çətinləşdirib: "Dəfələrlə aidiyyəti quruma müraciət edilsə də, problemin həlli və ya səbəbləri barədə heç bir rəsmi məlumat verilmir. Hökməli sakinləri olaraq xahiş edirik ki, bu problem ictimailəşdirilsin və aidiyyəti qurumlar məsələyə operativ şəkildə müdaxilə edərək problemin həlli istiqamətində tədbirlər görsünlər".
