Bu gün Bakı Ağır Cinayətlər Məhkəməsində hakim Səbuhi Hüseynovun sədrliyi ilə cinayətkar birlik təşkil etməkdə və bir sıra ağır cinayətlər törətməkdə təqsirləndirilən Xalid Tağıyevin məhkəmə prosesi başa çatıb.
Lent.az xəbər verir ki, istintaq materiallarına görə, X.Tağıyev 1995–1999-cu illərdə yaratdığı cinayətkar dəstə ilə birlikdə Bakı şəhərinin müxtəlif ərazilərində bir sıra qətllər, quldurluq, oğurluq və digər ağır cinayətlər törədib. O, 2000-ci ildə beynəlxalq axtarışa verilib və 2025-ci ilin fevralında saxlanılaraq istintaqa təhvil verilib.
Belə ki, onun 1998-ci il sentyabrın 2-də Suraxanı rayonu, Əmircan qəsəbəsində yerləşən fərdi yaşayış evinə basqın etməsinə, ev sahibi Məmməd Hacıyevi, həmin ilin sentyabr ayının sonunda Sabunçu rayonu, Bilgəh qəsəbəsində Arif Quliyevi, 1999-cu ilin sentyabr ayının 11-də isə Zahid Vəliyevi qəsdən öldürməsinə əsaslı şübhələr müəyyən edilib.
Dövlət ittihamçısı X.Tağıyevin 15 il azadlıqdan məhrum edilməsini istəyib.
Zərərçəkənin nümayəndəsi isə onun ən ağır cəzaya məhkum olunmasını tələb edib. Təqsirləndirilən şəxs çıxışında əməlindən peşman olduğunu bildirib.
Müşavirədən sonra məhkəmə Xalid Tağıyevin 15 il müddətinə azadlıqdan məhrum edilməsi barədə hökm elan edib.
