Bakı Ağır Cinayətlər Məhkəməsinin qərarı ilə iş yoldaşını başından stəkanla vurub öldürdüyünə görə 9 il 6 ay müddətinə azadlıqdan məhrum edilən Möhsün Abdullayevin cinayət işi üzrə ifadəsi məlum olub.
Pravda.az-ın əldə etdiyi məlumata görə, hakim Elnur Nuriyevin sədrliyi ilə keçirilən prosesdə Cinayət Məcəlləsinin 120.1-ci (qəsdən adam öldürmə) maddəsi ilə təqsirləndirilən şəxs kimi dindirilən Möhsün Abdullayev elan olunmuş ittihamla özünü qismən təqsirli bildiyini deyib və hadisənin başvermə şəraitindən danışıb.
Təqsirləndirilən şəxsin sözlərinə görə, o, 10 may 2025-ci il tarixdə, saat 08:00-dan 16:00-dək çalışdığı şirkətdə işdə olub. İş yoldaşı Bahadur Tağıyev ondan oksigen balonunu qarışdırmağı xahiş etdi. O isə bu işin təhlükəli olduğunu, vəzifə öhdəliklərimə daxil olmadığını deyərək bundan imtina edib.
Möhsün Abdullayev ifadəsində qeyd edib ki, bundan sonra Bahadur onu təhqir edib, təpiklə vurub və boğmağa çalışıb. Bu zaman özünü müdafiə edib, Bahaduru öldürmək niyyəti olmayıb.
O, ittiham aktında göstərilən kimi dörd dəfə yox, bir dəfə gildən hazırlanmış stəkanla Bahaduru vurduğunu, nəticədə zərərçəkmişin başından az miqdarda qan gəldiyini görərək geri çəkildiyini bildirib. Həmçinin zərərçəkmişin baş nahiyəsində əvvəldən də kəsik izlərinin olduğunu qeyd edib.
Təqsirləndirilən şəxs vurğulayıb ki, təxminən bir saat sonra zərərçəkmiş şəxs ona yaxınlaşaraq özünü pis hiss etdiyini bildirib və siqaret istəyib. Möhsün ona təcili tibbi yardıma zəng etməyi təklif edib, Bahadur isə buna ehtiyac olmadığını deyib. Daha sonra iş yoldaşının telefonu ilə təcili yardım çağırıb, lakin həkimlər gələnədək Bahadur artıq həyatını itirib.
Qeyd edək ki, 55 yaşlı Möhsün Abdullayev 1997-ci ildə də 8 il məhkum olunub
