Bakıda "Mercedes-Benz" markalı avtomobil qaçırılıb.
Hadisə Xətai rayonunda, "Həzi Aslanov" metro stansiyasının yaxınlığında baş verib.
24 yaşlı Bahadur Qasımov (şərti ad) gecə saatlarında vintaçanla avtomobilin arxa şüşəsini sındıraraq içəri daxil olub. Salonda kənd təsərrüfatı məhsullarını görən şəxs onları oğurlayıb satmaq istəyib. Lakin məhsulların hamısını təkbaşına daşıya bilməyəcəyini düşündüyü üçün avtomobili də qaçırıb.
O, məhsulları satdıqdan sonra avtomobili başqa ərazidə saxlayıb, açarı sürətlər qutusunun yanına qoyaraq oradan uzaqlaşıb. Daha sonra polis tərəfindən saxlanılıb.
Bahadur Qasımov ifadəsində əməlindən peşman olduğunu bildirərək yüngül cəza istəyib. Kənd məhsulları satmaqla dolandığını deyən zərərçəkən isə avtomobilə dəymiş ziyanın ödənilmədiyini bildirərək şikayətçi olub.
Məhkəmənin qərarı ilə B. Qasımov 3 ay 28 gün müddətinə azadlıqdan məhrum edilib.
mənbə: lent.аz
