Xəbər verildiyi kimi Xırdalanda antisanitar şəraitdə fəaliyyət göstərən quş kəsimi sexinin fəaliyyəti məhdudlaşdırılıb. Azərbaycan Qida Təhlükəsizliyi Agentliyinin (AQTA) yoxlaması zamanı 2 min baş ev quşunun baytarlıq tələbləri gözlənilmədən kəsiminin həyata keçirildiyi məlum olub. Eyni zamanda kənd toyuğu təəssüratı yaratmaq məqsədilə toyuqların rənglənməsi halları da aşkarlanıb.
Məsələyə münasibət bildirən Azad İstehlakçılar Birliyinin sədri Eyyub Hüseynov bizim.media-ya bildirib ki, insanlar qapalı şəraitdə saxlanılan broyler toyuqlarına deyil, tam azad bəslənən kənd toyuqlarına üstünlük verirlər: "Kənd toyuqlarını broyler və yarıqapalı saxlanılan digər toyuqlardan fərqləndirən cəhət ayaqlarının sarı olmasındadır. Bakıətrafı qəsəbələrdə 20-yə yaxın quşçuluq müəssisəsi var. Orada toyuqların ayaqlarını saraldırlar ki, kənd toyuqlarına oxşasın.
E.Hüseynov diqqətə çatdırıb ki, yaş ağ tənzifi toyuğun ayağına sürtməklə rəngi silmək olar, amma bütövlükdə rənglənmiş toyuqların gözlə ayırd edilməsi mümkün deyil: "Qida biznesi ilə məşğul olanlar mütləq Qida Təhlükəsizliyi Agentliyində qeydiyyata durmalıdırlar. Lakin biz görürük ki, toyuq biznesi ilə məşğul olanlar agentılikdə qeydiyyatda deyillər və antisanitar şəkildə toyuq satırlar. Vətəndaşlar belə toyuqlar harda görsə, agentliyin qaynar xəttinə zəng edib xəbər verməlidirlər. Bu məhsullar dərhal nəzarətə götürülməlidir".
Qeyd edək ki, toyuğun dərisini və yağ qatını çəhrayı-narıncı tonlara salmaq üçün kantaksantin adlı süni boyalardan istifadə olunur. Belə boyanmış toyuqları istehlak etdikdə qaraciyərdə yüklənmə, gözün torlu qişasında piqment toplanması, allergik reaksiyalar baş verir. Xüsusilə toyuq kəsildikdən dərhal sonra ətin birbaşa boya vannasına salınması təhlükəlidir və qida saxtakarlığıdır.
Ev şəraitində belə toyuqları müəyyənləşdiriməsinin sadə yolları var:
Öncə salfetə bükün, kağızda çəhrayı iz qalırsa süni boyadır. Əti kəsin, rəng yalnız səthdədirsə, sonradan boyanıb. Toyuğu qaynadın, su rənglənirsə təhlükəli ola bilər.
