Bakının Binəqədi rayonunda kişi kirayə qaldığı evin sahibinə xəsarət yetirib.
Hadisə ötən il mayın 23-də Biləcəri qəsəbəsində baş verib. Ağdam rayon sakini, 32 yaşlı Elmir (ad şərtidir) orta dərəcəli alkoqol sərxoşluğu vəziyyətində kirayədə yaşadığı evin həyətində ev sahibi Aqillə (ad şərtidir) mübahisə edib.
Mübahisəyə səbəb Elmirin qeyri-rəsmi münasibətdə olduğu Səmayə ilə kobud danışmasına ev sahibinin etiraz etməsi olub. Mübahisə zamanı Elmir masanın üzərindəki araq butulkası ilə Aqilin baş nahiyəsinə zərbə endirib. Nəticədə zərərçəkənin gözaltı nahiyəsi və göz qapaqlarında xəsarətlər yaranıb.
Elmir barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham irəli sürülüb. O, məhkəmədə təqsirini etiraf edərək hadisə zamanı sərxoş olduğunu və mübahisə əsnasında butulkanı götürüb ev sahibinin başına vurduğunu bildirib.
Binəqədi Rayon Məhkəməsinin hökmü ilə Elmir barəsində amnistiya aktı tətbiq edilib və o, cinayət məsuliyyətindən azad olunub.
mənbə: demokrat.az
