Abşeron Rayon Məhkəməsində qəsdən sağlamlığa yüngül zərər vurmaqda təqsirləndirilən Xalid Hacıyevin cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Abusət Qasımovun sədrliyi ilə keçirilən prosesdə hökm oxunub.
İttihama görə, hadisə 13 yanvar 2026-cı il tarixdə gecə saat 00:30 radələrində Abşeron rayonu ərazisində qeydə alınıb.
Belə ki, Xalid Hacıyevin həyat yoldaşı, zərərçəkmiş Yasəmən Hacıyeva ilə pişiyin saxlanılması ilə bağlı fikir ayrılığı yaranıb. Mübahisə zamanı təqsirləndirilən şəxs arvadının üzərinə hücum edərək əli ilə onun baş nahiyəsinə vurub. Bununla da zərərçəkmişin sağlamlığına qəsdən yüngül zərər vurulub.
Məhkəmə iclasında iştirak edən Yasəmən Hacıyeva məhkəməyə ərizə ünvanlayaraq, Xalid tərəfindən dəymiş ziyanın ödənilməsini, ona qarşı heç bir şikayət və tələbinin olmamasını, barəsində olan məhkəməyədək sadələşdirilmiş icraat materialına xitam verilməsini xahiş edib.
Məhkəmənin hökmü ilə onun cinayət əməlini törətməsinə dair məhkəməyədək sadələşdirilmiş icraat materialına xitam verilib və təqsirləndirilən şəxs cinayət məsuliyyətindən azad olunub.
