Abşeron Rayon Məhkəməsində qəsdən sağlamlığa yüngül zərər vurmada təqsirləndirilən Cavid Cəlilovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az xəbər verir ki, hakim Abusət Qasımovun sədrliyi ilə keçirilən prosesdə hökm elan olunub.
Məhkəmənin qərarına əsasən, "Konstitusiya və Suverenlik İli" münasibətilə elan edilən amnistiya tətbiq olunaraq, Cavid Cəlilov Cinayət Məcəlləsinin 128-ci maddəsi ilə cinayət məsuliyyətindən azad edilib və iş üzrə icraata xitam verilib.
İttihama görə, hadisə 22 yanvar 2025-ci il tarixdə gecə saat 03:30 radələrində Abşeron rayonu ərazisində baş verib. Cavid Cəlilov qeyri-rəsmi münasibətdə olduğu Malikə Nəbiyeva (adı, soyadı şərtidir) ilə mübahisə edib. Mübahisə qadının onun işləməməsi və ailəyə maddi dəstək verməməsi ilə bağlı irad bildirməsi səbəbindən yaranıb.
Bu zaman əsəbiləşən kişi qadına zor tətbiq edib, onun saçından tutaraq başını yatağa vurub, daha sonra bədəninin müxtəlif nahiyələrinə yumruq və əl zərbələri endirib.
Nəticədə zərərçəkmişə müxtəlif bədən xəsarətləri yetirilib. Ekspertiza həmin xəsarətləri sağlamlığın qısa müddətə pozulmasına səbəb olan yüngül xəsarətlər kimi qiymətləndirib.
Hadisədən sonra Cavid Cəlilov saxlanılaraq cinayət məsuliyyətinə cəlb edilib.
