Nizami Rayon Məhkəməsində keçmiş ərinin üzünü cızmaqda təqsirləndirilən Arifə Əsədovanın (ad, soyad şərtidir) cinayət işi üzrə hökm oxunub.
Məhkəmənin hökmü ilə qadın 1 000 manat cərimə olunub.
İttihama görə, hadisə Nizami rayonunda baş verib. Arifə Əsədova azyaşlı övladlarını götürmək üçün keçmiş ərinin evinə gedib. Tərəflər arasında uşaqlara görə mübahisə yaranıb. Rail Qədimov (ad, soyad şərtidir) uşaqları verməkdən imtina edib və qadını evdən çıxarmaq üçün sinəsindən itələyib. Bundan əsəbiləşən Arifə isə onun sifətinə sillə vurub və dırnağı ilə üzünü cızıb.
Nəticədə kişiyə sağlamlığın qısa müddətə pozulmasına səbəb olan yüngül xəsarətlər yetirilib.
Qadın məhkəmədə özünü təqsirli bilməyib. O, keçmiş ərinin uşaqları ona vermədiyini, həmçinin qadının kirayə qaldığı evdə pişik olduğuna görə həmin ünvana aparılmasına qarşı çıxdığını bildirib.
Arifə keçmiş ərinin onu itələdiyini, özünü müdafiə etmək üçün əlini qabağa uzatdığını və bu zaman dırnağının təsadüfən onun üzünü cızdığını deyib. Sillə vurduğunu isə inkar edib.
mənbə: pravda.аz
