"Xətai metrosunun qarşısında müasir dayanacaq quraşdırılıb, di gəl ki, kondisioner işləmir deyə avtobus gözləyənlər bu istidə günün altında dayanmağa məcbur olurlar".
Bu barədə tanınmış jurnalist Rumiyyə Miraslan öz "Facebook" səhifəsində yazıb.
Rumiyyə Miraslanın sözlərinə görə, kölgəlik də yoxdur ki, insanlar ona sığınsın, gün təpələrini deşməsin: "Sanki gözdağı verirlər camaata".
Məsələ ilə bağlı Azərbaycan Yerüstü Nəqliyyat Agentliyindən (AYNA) Bakuplus.az-a bildirilib ki, AYNA tərəfindən smart tipli pavilyonlara nəzarət məqsədilə dövri texniki baxışlar həyata keçirilir: "Eyni zamanda, vətəndaşlardan daxil olan müraciətlər əsasında da operativ araşdırmalar aparılır. Müxtəlif zamanlarda kənar şəxslər tərəfindən pavilyonun işlək elementlərinə, o cümlədən kondisioner sisteminə müdaxilələr olunur. Baxış zamanı bütün nöqsan və çatışmazlıqlar aradan qaldırılır".
