"Kontakt Home" mağazalar şəbəkəsindən telefon alan vətəndaş gözlənilməz sürprizlə qarşılaşıb.
Bununla bağlı vətəndaş Nərmin Əliyeva bakues.az-a şikayət məktubu göndərib.
Onun sözlərinə görə, "Kontakt Home"dan anasının ad günü üçün "Samsung" markalı telefon alıb. Lakin sonradan telefonun xarab olduğu məlum olub:
"Kontakt Home" mağazasından aldığım telefonda bir sıra proqramlar yüklənmir, "whatsapp" mesajları silinmir və ya yüklənən proqramları silmək mümkün deyil. Üzləşdiyim problemlə bağlı mağazaya məlumat verdikdə bildirdilər ki, məhsul xarab satılıbsa, əvəzinə yeni məhsul veriləcək. Və ya servis xidmətinə göndəriləcək və təmir olunacaq. Araşdırmadan sonra telefonu servis xidmətinə göndərdilər. Servis əməkdaşları bildirdilər ki, telefonun nasazlığı aradan qaldırılıb və bizə təhvil veriləcək. Lakin məhsul hələ də mənə qaytarılmayıb".
N. Əliyeva iddia edir ki, servis əməkdaşları "Sizinlə əlaqə saxlayacağıq" desə də, hələ ki heç addım atmayıblar.
"Telefon mənə xarab şəkildə satılsa da, məsələni ört-basdır etməyə çalışırlar. Əlimdə faktların olmasına baxmayaraq, "Kontakt Home" mənə işlək vəziyyətdə olan, təzə telefon satdığını iddia edir. Hətta mesajla bildiriş göndərilir ki, aldığım telefonda heç bir problem yoxdur", – deyə şikayətçi bildirib. O, problemin tezliklə həll olunmasını tələb edir.
