22 mart görkəmli sənətkar Lütfəli Abdullayevin doğum günüdür.
Lütfəli Abdullayev 1914-cü il tarixdə Nuxada (indiki Şəki) anadan olub.
Nuxada yeddiillik məktəbi bitirib.
1928-ci ildən Azərbaycan Dövlət Konservatoriyasının valtorna sinifinin məşğələlərində iştirak edib, o cümlədən paralel olaraq Berolskinin kursunda ifaçılıqla məşğul olub.
Nuxa fəhlə gənclər klubunun dram dərnəyində rollar oynayıb.
1928-ci ildə Bakıda konservatoriyanın valtorna sinifinin məşğələlərində iştirak edərkən, müsabiqə yolu ilə opera teatrının xor heyətinə qəbul olunub. Bundan sonra yardımçı aktyor kimi sözsüz və epizodik rollarda oynayıb. 1938-ci ildə yeni yaranan Azərbaycan Dövlət Musiqili Komediya Teatrında truppaya qəbul edilib.
1949-cu ilin yazında M.Əzizbəyov adına Milli Dram Teatrına keçib.
1951-ci ildən Azərbaycan Dövlət Filarmoniyasının nəzdində estrada ansamblı kimi çıxış edən muskomediya truppasında işləməyə başlayıb.
1956-ci ildən yenidən Azərbaycan Dövlət Musiqili Komediya Teatrında fəaliyyət göstərib.
1945-ci ildə Rza Təhmasibin lentə aldığı “Arşın mal alan” filmində Vəli rolunu oynayıb. Həmçinin “Əhməd haradadır?” (Zülümov), “Ulduz” (Məhəmməd), “Qəribə əhvalat” (Kefçilov) filmlərinə çəkilib.
9 dekabr 1973-cü il tarixdə – 59 yaşında, Bakıda vəfat edib. İkinci Fəxri xiyabanda dəfn olunub.
