Bu gün XXI Əsr Beynəlxalq Təhsil və İnnovasiya Mərkəzinin 3-cü sinif şagirdləri "Azərbaycanfilm" kinostudiyasında olublar.
Bakuplus.az xəbər verir ki, kinostudiyanın Aparat rəhbəri Azad Axundov şagirdlərə sənət ocağı haqqında məlumat verib. "Azərbaycanfilm" kinostudiyasını Azərbaycan mədəniyyətinin milli sərvəti adlandıran aparat rəhbəri onlara çəkiliş prosesindən də söhbət açıb.
İctimaiyyətlə əlaqələr və marketinq şöbəsinin rəhbəri Ramilə Qurbanlı Azərbaycan kinosunun və "Azərbaycanfilm"in tarixindən danışıb.
Sonra birlikdə kinostudiyaya ekskursiya həyata keçirilib. Uşaqlar "Azərbaycanfilm"in pavilyonları, geyim və rekvizit sexləri ilə tanış olublar. Sevdikləri kinoların və cizgi filmi personajlarının əlbəsələri, rekvizitləri uşaqlar tərəfindən maraqla qarşılanıb.
Kinostudiyanın işçiləri şagirdlərin kino və çəkilişlər barədə müxtəlif suallarını cavablandırıblar. Balaca qonaqlar səsyazma otağında xorla mahnı oxuyub və sonra öz səslərini dinləyiblər.
Dövlət Film Fondunun əməkdaşı Rəşad Qasımovun filmlərin saxlanma qaydası barədə məlumatından sonra məktəblilərə "Baharın oğurlanması" cizgi filmi nümayiş etdirilib.
