"Mayın 17-dən bəri - on beş gündən çoxdur ki, küçəmiz suyun içindədir. Yüzlərlə həyəti su basıb, yaşamağa şərait olmadığına görə evimizi tərk etmək məcburiyyətində qalmışıq".
Bu şikayətlə qafqazinfo.аz-a Masazır qəsəbəsinin Zərifə Əliyeva küçəsində yaşayan bir qrup sakin müraciət edib.
Onların iddiasına görə, məsələ barədə dövlət qurumlarına dəfələrlə bildirilsə də, problem həllini tapmayıb: "Dövlət qurumlarına müraciət etmişik. Gətirib motor qoyublar ki, suyu çəksinlər. Amma motor sayı bəs etmir deyə suyu çəkib qurtara bilmirlər. Hələ də həyətlərimiz suyun içərisindədir, dizdən yuxarıya qədər çəkmə olmadan evimizə girib-çıxa bilmirik. Həyətdə olan bütün əşyalarımız sıradan çıxıb, ağaclarımız məhv olub, evlərimizin bünövrəsi suyun altındadır..."
Problemlə bağlı İri Şəhərlərin Birləşmiş Su Təchizatı Xidmətindən bildirilib ki, hazırda ərazidən suyun çəkilməsi istiqamətdə sakinlərə köməklik göstərilir: "İntensiv yağışların fəsadları əsasən mərkəzləşdirilmiş kanalizasiya sisteminin və yağış kollektorlarının olmadığı ərazilərdə müşahidə edilir. Drenaj sistemlərinin qurulmadığı yollarda və ərazilərdə yağış suları tullantı su xətlərinə yönləndirilir. Bu hal isə kanalizasiya şəbəkələrinin artıq yüklənməsinə və suların daşınmasında maneələrin yaranmasına səbəb olur. Həmçinin elə ərazilər var ki, orada mərkəzləşmiş tullantı su şəbəkələri mövcud deyil və müəyyən ərazilərdə tikilən evlər əsasən fərdi yaşayış üçün nəzərdə tutulmayan torpaq sahələrində inşa olunub. O cümlədən evlərin tikintisi zamanı seçilən məkanlar coğrafi relyef baxımından məskunlaşmaq üçün əlverişsiz ərazilərdir. Bu baxımdan həmin evlərin həyətlərinə yağış sularının axaraq dolması halları baş verir. Lakin buna baxmayaraq, müvafiq sukanal idarələrinin briqadaları tərəfindən həmin ərazilərin mümkün şərtləri çərçivəsində suyun çəkilməsi istiqamətində sakinlərə köməklik göstərilir".
