“Hörmətli Ulucay Akif, Bakuplus.az-a "Mehriban Xanlarova yanlış məlumat verib" ifadəniz həqiqəti əks etdirmir və mövcud faktlarla təkzib olunur. Mövzuya dair konkret sübutlar əsasında bildirirəm ki, Kulis.az-ın əməkdaşı və məndən müsahibə alan jurnalist Ülvü Bahadır WhatsApp vasitəsilə göndərdiyi mesajda açıq şəkildə qeyd edir: "Mehriban xanım rəhbərliyə deyərək müsahibəni bərpa etdirdim. Çünki hər yerdə yayılıb."
Bakuplus.az xəbər verir ki, bu sözləri Əməkdar artist, Akademik Milli Teatrın aktrisası Mehriban Xanlarova öz Instagram hesabında yazıb.
Mehriban Xanlarova daha sonra Kulis.az-ı və saytın baş redaktoru Ulucay Akifi nəzərdə tutaraq aşağıdakıları qeyd edib: “Məsələnin məntiqi və faktoloji təhlili göstərir ki, əgər Mehriban Ələkbərzadə ilə bağlı olan açıqlamam heç vaxt silinməyibsə, onun yenidən bərpa edilməsi zərurəti hansı əsaslara söykənir? Bu ziddiyyət mövcud məlumatın qeyri-dəqiq və subyektiv mahiyyət daşıdığını aşkar şəkildə nümayiş etdirir. Mən uzun illərdir ki, peşəkar sənətkar kimi ictimaiyyətin diqqət mərkəzində fəaliyyət göstərir, bütün çıxışlarımda obyektiv və prinsipial mövqe sərgiləyirəm. Lakin hazırkı kontekstdə ya siz məsələnin mahiyyətini yetərincə araşdırmadan tələsik nəticəyə gəlmisiniz, ya da məlum faktları məqsədyönlü şəkildə təhrif edirsiniz. Heç kimin iş fəaliyyətinə və dolanışıq mənbəyinə mane olmaq kimi niyyətim yoxdur. Lakin sizin "Mehriban Xanlarova yanlış məlumat verib" və "aktrisanın belə qərəzli yanaşmasına təəssüf edirəm" deməniz məni faktları ictimaiyyətlə bölüşməyə məcbur edir.Bu faktları paylaşdıqdan sonra Ülvi Bahadır təzyiqə məruz qalarsa və ya işdən çıxarılarsa, bu, birbaşa rəhbərliyinizin göstərişi kimi qəbul ediləcək.
Bundan əlavə, jurnalistikanın fundamental prinsiplərinə zidd olan belə yanaşma təkcə Kulis.az informasiya resursunun deyil, APA informasiya agentliyinin işgüzar nüfuzuna və onun rəhbəri Vüsalə Mahirqızının peşəkar reputasiyasına ciddi şəkildə xələl gətirir. Peşəkar jurnalistika obyektivlik, dürüstlük və şəffaflıq prinsiplərinə əsaslanmalı, ictimaiyyətə təqdim olunan məlumatların həqiqətə uyğunluğu hər zaman təmin edilməlidir.
Mən sizin səhvinizi və yalanınızı etiraf edəcəyinizi gözləmirəm, lakin jurnalistikanın əsas etik prinsiplərinə hörmət etməyə və gələcəkdə obyektiv mövqe nümayiş etdirməyə çağırıram”.
