4 mart məşhur aktyor, əməkdar artist Elçin Həmidovun anım günüdür.
Elçin Qəzənfər oğlu Həmidov 1958-ci ildə Bakıda doğulub. Körpə yaşlarından əvvəlcə atasını, sonra isə anasını itirən Elçini və bacı-qardaşlarını əmisi himayəyə götürüb. Daha sonra o, əvvəlcə bacısı, sonra qardaşlarını itirib. 1974-cü ildə Azərbaycan Dövlət Musiqili Komediya Teatrında xor artisti vəzifəsində çalışıb. 1977-ci ildə İncəsənət İnstitutunun Dram-kino aktyoru fakültəsinə daxil olub, 1981-ci ildə həmin fakültəni bitirib.
1983-cü ildən Azərbaycan Dövlət Musiqili Komediya Teatrında artist-vokalist kimi fəaliyyət göstərib. Klassik və müasir Azərbaycan bəstəkarlarının əsərlərində müxtəlif rolları canlandırıb.
Elçin Həmidov bariton və soprano səsə malik idi. Tamaşalardakı musiqiləri ifa edirdi. O, epizodik rollarda da çıxış edir, məşhur simaları parodiya edirdi. Sənətçi “Parni iz Baku” və “Planet Parni iz Baku” KVN teatrlarının da simalarından biri idi. Bu teatr tamaşalarında və “Məhəllə” film seriyasında canlandırdığı Məzi personajı ilə geniş populyarlıq qazanmışdır. Bundan başqa o, televiziya verilişlərində də aparıcılıq edib.
Eliçin Həmidov 2011-ci ilin 4 martında sənətçi ürək tutmasından dünyasını dəyişib. Həmin vaxt teatrda “Hərənin öz ulduzu tamaşası”nın məşqi idi. Sənətçinin işə, məşqə gəlmədiyini görən dostları narahat olub evinə gediblər və Fövqəladə Hallar Nazirliyinin işçilərinin köməyilə evinin qapısı açılıb. Elçin Həmidov evində ölü halda tapılıb. Sənətçi Xırdalan qəbiristanlığında dəfn edilib.
