Bakının Yasamal rayonu, Həsən bəy Zərdabi prospektində yerləşən "Melissa Group" yaşayış kompleksinin mühafizəçisi İsmayıl Məmmədli orada yaşan sakin Eldar Əfəndiyevi döyüb.
Hadisə ilə bağlı Cinayət Məcəlləsinin 126.1-ci maddəsi ilə cinayət işi açılıb.
İttiham aktına görə, İ.Məmmədli aralarında yaranmış münaqişə zamanı E.Əfəndiyevi qəsdən yerə yıxıb, ona sağlamlığına həyat üçün təhlükəli olan ağır zərər vurub.
Məhkəmədə təqsirləndirilən şəxs ona elan olunmuş ittihamı qəbul etməyib. Zərərçəkmiş şəxs isə üç ildən artıqdır ki, həmin binada yaşadığını, mühafizəçilərin işlərini yaxşı görmədiyini bildirib.
Onun sözlərinə görə, hadisə günü binanın qarşısında avtomobillər normal saxlanılmayıb, mühafizəçi yerində olmayıb. Onun iddiasına görə, narazılığını bildirdiyi anda mühafizəçi zərərçəkəni yuxarı qaldıraraq yerə çırpıb.
Məhkəmənin hökmü ilə İ.Məmmədli 3 il müddətinə azadlıqdan məhrum edilib. Ona 2 il sınaq müddəti təyin edilməklə cəzası şərti hesab olunub.
mənbə: xitab24
