21 iyul görkəmli xanəndə, bəstəkar, Azərbaycanın xalq artisti Məmmədbağır Bağırzadənin doğum günüdür.
O, 1950-ci ildə Bakının Nardaran kəndində dünyaya gəlib.
Məmmədbağır Bağırzadə Azərbaycan musiqi sənətinin tanınmış nümayəndələrindən, xanəndə və bəstəkarlardan biri olub. Sənətkar yaradıcılıq yoluna toy və el şənliklərində başlayıb. Sonralar özünəməxsus ifa tərzi, güclü səsi və emosional təqdimatı ilə geniş tamaşaçı sevgisi qazanıb.
Məmmədbağır Bağırzadənin repertuarında muğamlar, xalq mahnıları və bəstəkar əsərləri ilə yanaşı, özünün bəstələdiyi mahnılar da xüsusi yer tutub. Ələkbər Tağıyev, Oqtay Kazımi, Nəriman Məmmədov və Tahir Əkbər kimi tanınmış bəstəkarların əsərlərini ifa edib. Şairə Zivər Ağayeva ilə yaradıcılıq əməkdaşlığı da onun sənət fəaliyyətində mühüm rol oynayıb.
Sənətkar 2002-ci ildə Azərbaycanın Xalq artisti fəxri adına layiq görülüb. O, 30 oktyabr 2005-ci ildə Bakı şəhərində vəfat edib. Nardaran qəbiristanlığında dəfn edilib.
Məmmədbağır Bağırzadənin ifasında səslənən mahnılar bu gün də sevilir və onun zəngin yaradıcılıq irsi Azərbaycan musiqi mədəniyyətinin dəyərli nümunələrindən biri kimi yaşayır.
