Abşeron rayonunun Məmmədli qəsəbəsi ərazisində gölün daşması bir sıra sakinləri çıxılmaz vəziyyətdə qoyub.
Xitab24.az xəbər verir ki, sakinlər problemin üç aya yaxındır davam etdiyini bildirsə də, onların çağırışına aidiyyəti qurumlarının cavab vermədiyini deyirlər.
Nəticədə ərazidə antisanitar vəziyyət yaranıb.
Maraq üçün onu bildirək ki, həmin yer "Makler evləri"nin çox geniş yayıldığı ərazidir. Bu evlərin isə qurudulmuş gölün üzərində inşa edildiyi heç kimə sirr deyil.
Belə olan halda haqlı sual yaranır: Abşeron Rayon İcra Hakimiyyətinin nəzarət etdiyi ərazilərdə at oynadan maklerlərə bu icazəni kim verib?
Hər halda onların özbaşına tikintiyə başladığı ehtimalı inandırıcı görünmür. Çünki əks halda qanunsuz evlərin tikintisinə dərhal müdaxilə edilir və onların söküntsünə başlanılır.
"Makler evləri" adətən yanğın təhlükəsizliyi də nəzərə alınmadan bır sırada, bir-birinə bitişik halda inşa edilir. Bu halda isə yanğına nəzarət edən Fövqəladə Hallar Nazirliyinin müvafiq qurumu da məsələyə müdaxilə etməlidir.
İndiki mövcud durumda isə Azərbaycan Dövlət Su Ehtiyatları Agentliyi daşan gölün Məmmədli Bələdiyyəsinin balansında olduğunu bildirir, qarşı tərəf isə göllərə ADESA-nın nəzarət etdiyini qeyd edir.
Yeganə gerçək budur ki, göl yerindədir, yerində olmayan isə suyun yerində tikilən evlərdir. Bu evlərin tikintisinə icazənin nəyin qarşılığında verilməsini araşdırmaq isə hüquq-mühafizə orqanlarının səlahiyyətinə daxil olan məsələdir.
Qeyd edək ki, Abşeron Rayon İcra Hakimiyyətinin başçısı Abdin Fərzəliyevdir.
