Bakıda kirayədə birlikdə yaşadığı şəxsi qətlə yetirməkdə təqsirləndirilən Hüseyn Həsənovun məhkəməsi davam edib.
Bakı Ağır Cinayətlər Məhkəməsində keçirilən iclasda təqsirləndirilən Hüseyn Həsənov özünü təqsirli bilib. O bildirib ki, mərhum Zəfər Məmmədovla təxminən bir aya yaxın eyni otaqda, günü 4 manata kirayədə qalıblar.
Onun sözlərinə görə, hadisə günü birlikdə spirtli içki qəbul ediblər. Həsənov iddia edib ki, Zəfər Məmmədov əvvəllər məhkum olunmasını tez-tez üzünə vurur, onu alçaldır və buna görə əsəbiləşərək çantasında olan bıçaqla yatdığı yerdə ona çoxsaylı zərbələr endirib. Təqsirləndirilən əməlindən peşman olduğunu və içkili olmasaydı, hadisənin baş verməyə biləcəyini deyib.
Ev sahibi şahid qismində ifadəsində bildirib ki, səs-küy eşidərək otağa qalxıb. Qapını açan Hüseyn Həsənov ona "Gəlmə, bibi, çıx get" desə də, içəri daxil olduqda Zəfər Məmmədovu qan içində görüb və qonşuları köməyə çağırıb.
Qeyd edək ki, hadisə Sabunçunun Ramana qəsəbəsində baş verib. İttihama görə, Hüseyn Həsənov birlikdə kirayədə yaşadığı Zəfər Məmmədovu 23 bıçaq zərbəsi ilə qətlə yetirib. Növbəti məhkəmə prosesi iyulun 24-nə təyin edilib.
mənbə: lent.az
