Rusiyanın paytaxtı Moskvadakı keçmiş “Bakı” kinoteatrının binası yenidən qurulub və “Görüş yeri Bakı” adını alıb. Bakuplus.az xəbər verir ki, bu barədə məlumat Facebookdakı "Bakı gündəliyi" səhifəsində yer alıb.
Məlumatda qeyd edilir ki, Moskvada sovet dövründən qalma kinoteatr binaları yenidən qurulur və mədəni-istirahət mərkəzləri kimi sakinlərin istifadəsinə verilir.
“Görüş yeri” layihəsi çərçivəsində yenilənən kinoteatr binaları “rayon mərkəzi” rolunu oynayır. Bu mərkəzlər yerləşdikləri ərazilərdə sakinlərə şəhər xidmətləri təqdim edirlər. Layihəni 2014-cü ildən başlayaraq yerli “ADG group” şirkəti həyata keçirir. Keçmiş “Bakı” kinoteatrının binası da məhz bu layihə çərçivəsində yenidən qurulub. Bu mərkəzdə müxtəlif məşğələlər, mühazirələr, təqdimatlar, ustad dərsləri, həmçinin xoreoqrafiya, vokal, şahmat və s. üzrə dərslər keçiriləcək. Mərkəzdə vacib ərzaq və məişət mallarının, dəftərxana ləvazimatlarının satıldığı mağazalar, kafe və restoran açılıb. Fitnes-klub da fəaliyyət göstərəcək.
