Son günlər sosial şəbəkələrdə görkəmli sənətkar, xalq artisti Rübabə Muradovanın məzarının baxımsız halda fotoları paylaşılır. Bir çox izləyici məzarın baxımsız halda olmasına görə sənətkarın ailə üzvləri və aidiyyəti qurumları günahlandırır.
Görkəmli sənətkarın nəticəsi, tanınmış aparıcı Abbasağa Əlizadə isə moderator.az-a ulu nənəsinin məzarının fotosunu təqdim edib və sosial şəbəkələrdə yayılan məzar görüntüsünün köhnə olduğunu bildirib: "Daş parçalana da, çatlaya da bilər. Bu, təbii haldır. Nəzərə almaq lazımdır ki, Rübabə xanım 1983-cü ildə dünyasını dəyişib və həmin məzar daşı da o illərdə qoyulub. Biz sənətkarın ailəsi olaraq həmin ağ mərməri saxlamaqla məzar daşını bərpa etdik, yazıları səliqə ilə yazdırdıq. Məzar daşı şəkili dəyişdirilməyib, amma təmizlənib. Sosial şəbəkələrdə tez-tez köhnə məzarın fotosunu yayımlayırlar. Kimsə əvvəlki vəziyyətdə görüb, şəklini çəkib. Həmin şəxsin də bu addımını hörmətlə qarşılayıram. Bu, məncə, sənətkara olan dəyərdən irəli gəlir. Nə yaxşı ki, bu cür insanlar var, hələ də yaşayırlar, sənətkara, sənətə dəyər verirlər və paylaşırlar".
