Mart ayından etibarən moped və motosiklet sürücülərini yeni və daha sərt qaydalar gözləyir. Artıq ikitəkərli nəqliyyat vasitələrini idarə etmək üçün A1 kateqoriyalı sürücülük vəsiqəsi, dövlət qeydiyyatı və nömrə nişanı məcburi olacaq.
Yeni qərara əsasən, kaska taxmaq tələbi qüvvədə qalır, ölçüləri 0,5 metrdən artıq kənara çıxan yüklərin daşınmasına isə icazə verilməyəcək. Eyni zamanda yalnız yolun sağ zolağı ilə hərəkət etmə məhdudiyyəti ləğv olunur.
Yeni qaydalar qəzaların azalmasına real təsir göstərəcəkmi?
Məsələ ilə bağlı bizimyol.info-ya açıqlamasında nəqliyyat eksperti Adil Nəbiyev bildirib ki, nəzarət zəif olsa, nəticə də zəif olacaq.
"Yeni qaydalar kağız üzərində daha sərt, praktikada isə daha sistemli və təhlükəsizlik yönümlü yanaşmanı göstərir. A1 kateqoriyalı sürücülük vəsiqəsinin, dövlət qeydiyyatının və nömrə nişanının məcburi olması o deməkdir ki, moped və motosiklet artıq nəzarətsiz nəqliyyat vasitəsi statusundan çıxır. Bu, ilk növbədə sürücülərin yol hərəkəti qaydalarını bilmə səviyyəsini yüksəldir və məsuliyyətsiz istifadə hallarını azaldır. Kaska tələbinin saxlanılması ölüm və ağır xəsarət riskini birbaşa aşağı salan amildir, ölçüdən artıq yüklərin daşınmasına qadağa isə tarazlıq itkisi və qəfil manevrlərdən yaranan qəzaların qarşısını alır. Sağ zolaq məhdudiyyətinin ləğvi isə axında daha çevik hərəkətə imkan verərək sıxlıq və riskli sıxışdırmaları azalda bilər. Amma real təsir yalnız qaydaların icrası ilə ölçüləcək: nəzarət zəif olsa, nəticə də zəif olacaq. Əgər maarifləndirmə, davamlı nəzarət və cərimələrin qaçılmazlığı təmin edilərsə, bu dəyişikliklər qəzaların sayını azaltmaq üçün real və uzunmüddətli effekt verə bilər", - deyə Adil Nəbiyev qeyd edib.
