Nərimanov Rayon Məhkəməsində xuliqanlıqda təqsirləndirilən Vəli Ömərovun cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Kamal Babayevin sədrliyi ilə keçirilən prosesdə hökm oxunub.
İttihama görə, hadisə 03 yanvar 2025-ci il tarixdə, saat 18 radələrində paytaxtın Nərimanov rayonu ərazisində yerləşən zərərçəkmiş Malik Yusifova məxsus ticarət obyektində baş verib.
İstintaqla müəyyən edilib ki, şəxsi münasibətlər zəminində yaranmış mübahisə zamanı Vəli Ömərov hadisə yerindən götürdüyü dəmir parçası ilə zərərçəkmiş şəxsin baş nahiyəsinə qəsdən bir dəfə zərbə endirib.
Məhkəmə istintaqı zamanı Vəli Ömərov ona qarşı irəli sürülmüş ittiham üzrə özünü təqsirli bilməyib. Vəli Ömərovun sözlərinə görə, o, hadisə günü Malikin mağazasına gedib, maddi çətinlik səbəbindən 5-10 manatlıq meyvə-tərəvəz məhsullarını nisyə götürmək istəyib. Lakin zərərçəkmiş şəxs imtina edərək onu mağazadan qovmağa və təhqir etməyə başlayıb.
Vəli Ömərov ifadəsində deyib ki, bu zaman Malik ona qarşı fiziki zor tətbiq edib, taxta parçası ilə baş və bədən nahiyələrinə zərbələr endirib, hətta onu yerə yıxaraq boğmağa çalışıb. O isə özünü müdafiə etmək məqsədilə yaxınlıqdan götürdüyü dəmir boru ilə zərərçəkmiş şəxsin baş nahiyəsinə zərbə vurub.
Məhkəmənin hökmü ilə Vəliyə 8 ay müddətinə azadlıqdan məhrumetmə cəzası təyin edilib. "Konstitusiya və Suverenlik İli" münasibətilə amnistiya elan edilməsi haqqında" Milli Məclisin 19 dekabr 2025-ci il tarixli Qərarının müvafiq maddələri tətbiq edilərərək cəzadan azad olunub.
Qeyd edək ki, ad və soyadlar şərti verilib.
