Bir müddət əvvəl Azərbaycan Uşaqlar Birliyinin rəhbəri Kəmalə Ağazadə sosial şəbəkə hesabında 12 yaşlı qızın cəzaçəkmə müəssisəsində saxlanılan ögey atası ilə görüş zamanı cinsi zorakılığa məruz qalması barədə məlumat yayıb. Həmin paylaşım ictimaiyyətdə geniş rezonans yaratdı.
Ardınca Ailə, Qadın və Uşaq Problemləri üzrə Dövlət Komitəsi açıqlama yayaraq azyaşlının müvəqqəti sığınacağa yerləşdirildiyini bəyan etdi.
Qafqazinfo.az-ın əldə etdiyi məlumata görə, hadisə qarışıq rejimli cəzaçəkmə müəssisələrindən birində baş verib.
Orada saxlanılan 43 yaşlı məhkum Şamo Rəsulov həmin 12 yaşlı qızın anası ilə nikahdadır. Bu səbəbdən qadın uzunmüddətli görüş üçün müəssisəyə gedərkən 12 və 7 yaşlı qızlarını da özü ilə aparıb.
İddia olunur ki, üçgünlük görüş zamanı Şamo Rəsulov həyat yoldaşının yetkinlik yaşına çatmayan qızına cinsi zorakılıq edib.
Məlum olub ki, Şamo 3 il əvvəl elə zorlama cinayətinə görə məhkum edilibmiş. O, yaşadığı evə kommunal ödəniş toplamağa gələn Mənzil-Kommunal Təsərrüfat Departamentinin əməkdaşı olan orta yaşlı qadını zorlayıb. Bu əməlinə görə kişiyə 10 il həbs cəzası verilib. Ş.Rəsulov hökm qüvvəyə minən vaxtdan "zon"a köçürülüb.
Məsələ prokurorluğun nəzarətindədir, Xətai Rayon Prokurorluğunda araşdırma başlanılıb, dəlil və sübutlar toplanılır.
