Bu gün, 29 sentyabr Xalq artisti, cazmen Cavan Zeynallının doğum günüdür. Xalq artistinin 80 yaşı tamam olur. O, 1945-ci ildə Bakıda dünyaya gəlib.
Bakuplus.az-ın əməkdaşı bu münasibətlə xalq artisti ilə əlaqə saxlayıb.
Cavan Zeynallı saytımıza açıqlamasında bildirib ki, yubileyini ötən gün dostları ilə birgə qeyd edib:
"Siz bilirsiniz də, mənim 40 yaşım var. Amma hamı yazıb ki, 80 yaşım olur. Hətta ruhən 20 yaşdayam. Pianinoda ifa edəndə isə daha da uşaqlaşıram.
Dünən həftəsonu olduğu üçün çox yaxın dostlarım zəng edib dedilər ki, gəl, doğum gününü keçirək. O vaxtın sənətçiləri, yaxın dostlarım hamısı yığışdı, oturduq bir restoranda qeyd etdik".
Sənətçi ad günündə özünə heç nə arzulamadığını deyib:
"Mən heç nə istəmirəm, özümə də heç nə arzulamıram. Tək istədiyim sakit həyat yaşayıb, pianinoda ifa etməkdir.
Pandemiyadan sonra bəzi adamlar deyir ki, caz heç kimə lazım deyil. Bu sözü eşidəndən sonra qərar verdim ki, cazı ancaq evdə ifa edim, konsertdə yox. Son 3-4 ildə yaxşı musiqiçilər azalıb. Ona görə konservatoriyanın tələbələri də azlıq təşkil edir. Gənclərə tək tövsiyəm odur ki, mədəniyyətləri olsun. Sonrası düzələndir".
