Azərbaycanın Xalq artisti, tanınmış bəstəkar, müğənni və ictimai-siyasi xadim Polad Bülbüloğlunun şəxsi həyatı ilə bağlı mediada yeni məlumat yayılıb. Belə ki, onun üçüncü dəfə ailə həyatı qurduğu bildirilir.
Bakuplus.az xəbər verir ki, ifaçının yeni həyat yoldaşı Azərbaycanın Əməkdar artisti, tanınmış rəqqasə və pedaqoq Eteri Cəfərovadır.
1978-ci ildə anadan olan Eteri Cəfərova Azərbaycan milli rəqs sənətinin tanınmış nümayəndələrindəndir. 1996-cı ildə Bakı Xoreoqrafiya Məktəbini ansambl artisti ixtisası üzrə bitirib, daha sonra Azərbaycan Dövlət Mədəniyyət və İncəsənət Universitetində təhsil alıb.
Peşəkar fəaliyyətinə 1996-cı ildə Azərbaycan Dövlət Rəqs Ansamblında rəqqasə kimi başlayıb. 2014-cü ildən Bakı Xoreoqrafiya Akademiyasında Azərbaycan və xalq səhnə rəqslərindən dərs deyir. Hazırda akademiyanın baş müəllimi və doktorantıdır, eyni zamanda Moskva Dövlət Xoreoqrafiya Akademiyasında təhsil alır və çalışır.
Eteri Cəfərova bir sıra rəqslərin quruluşçu xoreoqrafıdır. Onun yaradıcılığında "Sarı gəlin", "Mən səni araram", "İnnabı", "Dağlı", "Qavalla" və digər rəqslər xüsusi yer tutur.
2007-ci ildə "Əməkdar artist" fəxri adına layiq görülüb, 2010–2015-ci illərdə Prezident mükafatçısı olub. 2019-cu ildə milli rəqs sənətinə töhfələrinə görə "Humay" mükafatına, 2021-ci ildə isə "Fəxri akademik" adına layiq görülüb.
Maraqlıdır ki, 2025-ci ilin fevralında Heydər Əliyev Sarayında Polad Bülbüloğlunun 80 illiyinə həsr olunmuş "Qayıdış" adlı yubiley gecəsinin baş baletmeysteri məhz Eteri Cəfərova olub. Onlar səhnədə də birgə çıxış ediblər. E.Cəfərova Polad Bülbüloğlunun ifa etdiyi xalq mahnılarının xoreoqrafik təqdimatlarında solist kimi yer alıb.
