Abşeron rayonunda 32 yaşlı kişi onunla barışmaq istəməyən əvvəllər sevgi münasibətində olduğu qadına xəsarət yetirib.
Demokrat.az xəbər verir ki, hadisə ötən ilin avqustun 24-də rayonun Mehdiabad qəsəbəsi, 28 may küçəsində baş verib. 1994-cü il təvəllüdlü Zöhrab həmin gün saat 21 radələrində qeyd olunan küçədə əvvəllər qeyri-rəsmi ər-arvad münasibətində olduğu Samirəyə (adlar şərtidir – red.) yaxınlaşıb, onunla yenidən barışmaq istədiyini bildirib.
Bu zaman Samirə Zöhrabın barışmaq niyyətinə müsbət cavab verməyib. Bundan hiddətlənən Zöhrab qadının üzərinə hücum edib, əl, yumruq zərbələri ilə onun sifət və baş nahiyələrinə vurub.
Faktla bağlı təqsirləndirilən şəxsin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham verilib. Abşeron Rayon Məhkəməsinə ərizə təqdim edən qadın təqsirləndirilən şəxslə barışdığını deyib. O, Zöhrabı bağışladığını, ona qarşı şikayəti olmadığını qeyd edib. Bu halları nəzərə alan hakim təqsirləndirilən şəxsin barəsində olan cinayət təqibinə xitam verib. O, cinayət məsuliyyətindən azad edilib.
