19 dekabr görkəmli aktrisa Gülşən Qurbanovanın doğum günüdür.
Gülşən Ağadadaş qızı Qurbanova 1950-ci ildə Bakıda anadan olub. Orta təhsilini 175 saylı məktəbdə rus dilində alıb. 15 yaşında Kitabxanaçılıq texnikumunu bitirdikdən sonra TV-də rejissor assistenti işləməyə başlayıb. 1974-cü ildə Azərbaycan Teatr institutunun aktyorluq fakültəsini bitirib. Gənc Tamaşaçılar Teatrının aparıcı aktrisalarından olub.
Aktrisa teatrda işlədiyi illərdə "Mənim nəğməkar bibim", "Ana laylası", "Tamahkar", "Fudzi dağında qonaqlıq", "Zəncirlənmiş Prometey", "Pul dəlisi", "Bala bəla sözündəndir" kimi tamaşalarda koloritli obrazlar yaradıb. Onun filmoqrafiyasında isə 20-dən artıq film yer alıb. Gülşən Qurbanova aktyor Ağadadaş Qurbanovun qızı olub. Atasının faciəvi ölümü isə onun gözlərinin qarşısında baş verib. Ağadadaş Qurbanov Salyana qastrola gedəndə 15 yaşlı Gülşəni də özü ilə bərabər aparıb. Mehmanxanaların birində Gülşənlə atasının dayandığı eyvan uçub. Ağadadaş Qurbanov vəfat edib, Gülşənin isə qolu sınıb. Onu xəstəxanaya aparıblar və atasının ölümünü bir müddət ondan gizlədiblər.
Məşhur aktyor Hamlet Qurbanov aktrisanın ata bir ana ayrı qardaşı olub. Atasının ölümünə qədər onlar heç zaman görüşməyiblər. Yalnız atasının dəfn mərasimində bacı-qardaş tanış olublar.
Gülşən Qurbanova dünyasını dəyişəndən sonra onun qəbirdə dirildiyi, kəfəni cırdığı haqda iddialar yayılıb. İddialarda qeyd olunur ki, ölümündən bir neçə gün sonra onun qəbri yaxınları tərəfindən açılıb, aktrisanın üz gözünün cırıq-cırıq olduğunu görüblər.
Lakin bu söz-söhbətlərdən sonra aktrisanın qızı Kəmalə bir neçə sayta açıqlama verərək bildirib ki, Gülşən Qurbanovanın ölümü ilə bağlı yayılan bu fikirlər heç bir halda həqiqəti əks etdirmir.
