Dekabrın 24-də “Nizami” Kino Mərkəzində “Qırxdan sonra…” qısametrajlı bədii filmin təqdimatı olub.
Bakuplus.az xəbər verir ki, mədəniyyət və incəsənət xadimlərinin, media mənsublarının iştirak etdiyi nümayişdən öncə səhnəyə çıxan filmin yaradıcı heyəti ekran əsəri, yaranma ideyası, mövzu və əsas mesajları barədə məlumat veriblər.
Filmin ssenari müəlliflərindən olan Sevda Sultanova filmdə nəinki aktrisaların, ümumilikdə qadınların düşüncələrinə, müəyyən yaşdan sonrakı mənəvi mübarizəsinə yer verdiklərini bildirib.
Filmin ssenari və quruluş müəllifi Saida Haqverdiyeva “Qırxdan sonra”da cəmiyyətimizdəki qadınların, xüsusən yaradıcı qadınların ümumiləşmiş obrazını yaratmağa çalışdıqlarını deyib. O, filmin ərsəyə gəlməsində dəstək verən qurum və şəxslərə təşəkkürünü bildirib, bu silsilədən daha iki film çəkəcəyini, hazırda ikinci ekran işi üzərində işə başladıqlarını da əlavə edib.
Filmin qəhrəmanları – aktrisalar Zümrüd Qasımova və Gülçöhrə Abdullayeva belə bir fərqli və maraqlı layihəyə görə yaradıcı heyətə təşəkkür ediblər.
Qeyd edək ki, film Mədəniyyət Nazirliyinin dəstəyi ilə nümayiş olunub.
