Bakıda 53 yaşlı kişi ailə münaqişəsi zəminində yaranan mübahisə zamanı qızına xəsarət yetirib.
Demokrat.az-ın əldə etdiyi məlumata görə, hadisə Xətai rayonu, 8 Noyabr prospektində baş verib. Bakı şəhər sakini, 1973-cü il təvəllüdlü Zaur fərdi yaşayış evində ailə-məişət zəminində yaranmış mübahisə zamanı qəsdən qızı İlhamənin (adlar şərtidir – red.) bədəninin müxtəlif nahiyələrinə əl zərbələri endirərək ona müxtəlif dərəcəli bədən xəsarətləri yetirib.
İş üzrə izahat verən Zaur bildirib ki, hadisə baş verən gün işdən yorğun qayıtdığı üçün yatmaq qərarına gəlib:
"Lakin gecə saat 01:00 radələrində qızım və həyat yoldaşım yüksək səslə danışdıqları üçün onlara qışqıraraq sakit olmalarını bildirdim. Bu zaman qızım mənə cavab qaytardıqda əsəbiləşdim və qəsdən onun üz, qarın və baldır nahiyələrinə 2-3 dəfə şillə vurdum", - deyə Zaur bildirib.
Təqsirləndirilən şəxs ifadəsinin sonunda baş vermiş hadisə ilə bağlı zərərçəkmiş şəxslə barışdığını, qızını vurduğuna görə əməlindən peşman olduğunu bildirib. O, barəsində aparılan cinayət təqibinə xitam verilməsini xahiş edib.
Xətai Rayon Məhkəməsinin hökmü ilə Cinayət Məcəlləsinin 73.2-ci maddəsinə əsasən təqsirləndirilən şəxs cinayət məsuliyyətindən azad edilib. İş üzrə cinayət təqibinə xitam verilib.
