Sumqayıt Apellyasiya Məhkəməsində qohumunu xüsusi amansızlıqla öldürməkdə təqsirləndirilən Vüqar Abuzərovun barəsindəki qərardan verilən apellyasiya şikayəti üzrə məhkəmə prosesi başa çatıb.
Hakim Ruhiyyə Əsgərovanın sədrliyi ilə keçirilən prosesdə qərar elan edilib.
Qərara əsasən, təqsirləndirilən şəxsin apellyasiya şikayəti təmin edilməyib.
İttihama görə, hadisə 29 avqust 2025-ci il tarixdə, saat 11 radələrində təqsirləndirilən şəxsin yaşadığı Abşeron rayonunun Saray qəsəbəsində qeydə alınıb.
Zərərşəkmiş şəxs 1971-ci il təvəllüdlü Adil İmambaxışov Vüqar Aburzərovun evində təmir işləri görüb. Onlar qohum olublar. Günlərin birində isə məhz təmir işləri ilə bağlı bu şəxslər arasında mübahisə yaranıb. Mübahisə zamanı Adil hamam otağında olan şüşə banka ilə Vüqarın başına zərbə endirib.
Bundan sonra Vüqar Adili öldürmək qərarına gəlib. O, bıçaqla zərərçəkmişin bədəninin müxtəlif nahiyələrinə, eləcə də həyat fəaliyyəti üçün mühüm əhəmiyyət daşıyan orqanların yerləşdiyi nahiyələrə çoxsaylı zərbələr endirib.
İttihama əsasən, Vüqar xüsusi amansızlıq nümayiş etdirib.
Məhkəmə-tibbi ekspertizanın nəticələrinə əsasən, Adilin bədənində ümumilikdə 14 kəsilmiş-deşilmiş və kəsilmiş yara müəyyən edilib. Həmin xəsarətlərdən yaranmış kəskin daxili və xarici qanitirmə Adilin ölümünə səbəb olub.
Məhkəməsinin hökmü ilə Vüqar Abuzərov 17 il azadlıqdan məhrum edilib.
