Bakının Sabunçu rayonunun Zabrat qəsəbəsində qonşular arasında baş verən mübahisə məhkəmə ilə nəticələnib.
Demokrat.az xəbər verir ki, 1982-ci il təvəllüdlü Azər Səmədov (ad şərtidir) 2024-cü il oktyabrın 3-də qonşusu Elçin Quliyevin işlədiyi mağazaya daxil olaraq onun evinə gələn şəxslərin fotosunu çəkdiyini iddia edib. Elçin bunu inkar etdikdən sonra aralarında mübahisə yaranıb.
Azər əsəbiləşərək mağazadakı fincanı Elçinə atıb. Fincan zərərçəkmişin başına dəyərək qırılıb və ona xəsarət yetirib.
Zərərçəkmiş Elçinin sözlərinə görə, Azərlə eyni məhəllədə yaşayırlar və aralarında qonşu kimi normal münasibət var.
Elçin ifadəsində bildirib ki, Azər narkotik istifadə etdiyinə görə məhəlləyə yad şəxslər gəlib-gedirmiş. Hadisənin olduğu gün də həmin yad şəxslər gəlib və Azərin başına yığışıblar. Elçinin dediyinə görə, o, telefonu qaldıraraq guya onların şəklini çəkirmiş kimi davranıb. Bunu isə həmin adamları qorxutmaq məqsədilə etdiyini bildirib. Elə bu səbəbdən mübahisə yaranıb.
Azər barəsində Cinayət Məcəlləsinin müvafiq maddəsi ilə ittiham irəli sürülüb. Sabunçu Rayon Məhkəməsinin hökmü ilə o, 1 il 11 ay 28 gün müddətə azadlıqdan məhrum edilib. Müdafiəçinin apellyasiya və kassasiya şikayətləri təmin olunmayıb.
