"Nə Rəşad? Rəşad kimdir? Mən Rəşadı tanımıram".
Bunu qaynarinfo.az-a açıqlamasında Azərbaycan Kinematoqrafçılar İttifaqının sədri, Xalq artisti Rasim Balayev mədəniyyət nazirinin Kino Agentliyinə baş direktor təyinatından danışarkən deyib.
Rasim Balayev Rəşad Əzizovu tanımadığını vurğulayıb:
"Mən onun təyinatı ilə bağlı heç nə deyə bilmərəm. Bilmirəm kimdir. Məndən niyə soruşursunuz? Mədəniyyət Nazirliyindən soruşun".
Xalq artisti Əbdül Mahmudbəyov isə Rəşad Əzizovun Əməkdar incəsənət xadimi Cəmil Quliyevin kadrı olduğunu diqqətə çatdırıb:
"Cəmil müəllimin yanında işləyib, zəng edib onu təbrik edəcəm".
Əli İsa Cabbarov isə pozitiv dəyişikliklərə ümid etdiyini bildirib:
"Düşünürəm ki, nazirlik rəhbərliyinin yeni direktora daha çox etibarı var və bu agentliyin işində müsbət effekt verəcək. Kinematoqrafçılar İttifaqı olaraq agentliklə tərəfdaş münasibətlərinin artacağına ümid edirik. Birlikdə ssenari müsabiqələrinin, festivalların keçirilməsi, film layihələrinin və tələbə filmlərinin dəstəklənməsində işləyə bilərik".
Qeyd edək ki, Mədəniyyət Nazirliyinin tabeliyində fəaliyyət göstərən Azərbaycan Respublikası Kino Agentliyinə baş direktor təyin olunub. Mədəniyyət naziri Adil Kərimlinin müvafiq əmri ilə Rəşad Əzizov bu vəzifəyə təyinat alıb.
