28 avqust korifey sənətkar Rübabə Muradovanın anım günüdür.
Rübabə Muradova 22 mart 1933-cü ildə İranın Ərdəbil şəhərində anadan olub. Bir müddət Sabirabad Dövlət Dram Teatrında işləyib. Ələsgər Ələkbərov təsadüfən onu görüb Bakıya, Filarmoniyaya dəvət edib. 1951–1955-ci illərdə A. Zeynallı adına Bakı Musiqi Məktəbində (Seyid Şuşinskinin sinfində) təhsil alıb.
1954-cü ildən ömrünün sonuna kimi Azərbaycan Dövlət Opera və Balet Teatrında əvvəlcə solist, sonra məşqçi-pedaqoq olub. Rübabə Muradova "Leyli və Məcnun"da Leyli, "Əsli və Kərəm"də Əsli, "Koroğlu"da Xanəndə qız, "Şah İsmayıl"da Ərəbzəngi, "Aşıq Qərib"də Şahsənəm, "Gəlin qayası"nda isə Sənəm rollarını ifa edib. Rübabə Muradovanın çox yüksək sənətkarlıqla oxuduğu mahnılar bu gün də dillər əzbəridir.
Görkəmli sənətkar 28 avqust 1983-cü ildə qaraciyər serozundan vəfat edib və Yasamal qəbiristanlığında dəfn edilib.
