"Park Yasamal" yaşayış kompleksinin sakinləri ümumi yolda aparılan təmir işlərindən narazıdır.
Bakuplus.az-a müraciət edən vətəndaşların sözlərinə görə, yenidənqurma işlərinin təşkili ilə bağlı "Kristal Abşeron" şirkətinə rəsmi və şifahi müraciətlər ünvanlansa da, indiyədək hər hansı cavab almaq mümkün olmayıb.
Şikayətçilər bildirirlər ki, sözügedən yaşayış kompleksi 2024-cü ildə gecikmə ilə təhvil verilib. Hazırda isə avtomobillərin park edilməsi üçün nəzərdə tutulan ərazilərin böyük hissəsi müxtəlif səbəblərlə istifadədən çıxarılıb.
Onların sözlərinə görə, artıq uzun müddətdir ki, gölün kənarından keçən yolda təmir işləri aparılır. Mühafizə zolağından daha geniş ərazi isə çəpərlənərək bağlanıb.
Bundan daha öncə isə şirkətin satış ofisinin qarşısındakı sahənin də bağlandığı iddia edilir. Sakinlər əlavə edirlər ki, kompleksin müxtəlif hissələrində parkinq yerləri tikinti materialları ilə tutulub.
Yaranmış vəziyyət səbəbindən sürücülər saatlarla boş dayanacaq yeri axtarmağa məcbur qalır, avtomobillərini uzaq məsafədə saxlayaraq evlərinə piyada getməli olurlar.
"Parkinq tapmaq çox çətindir. Supermarket bir binanın qarşısını, tikinti şirkəti isə digər binanın önünü zəbt edib. Yazılı və şifahi müraciətlərimiz cavabsız qalır. Yolun təmirini Azərbaycan Avtomobil Yolları Dövlət Agentliyi aparır, yoxsa "Kristal Abşeron" – bu da aydın deyil. Ən azı çəpərlənmənin düzgün təşkilinə nəzarət etmək olardı. Həmçinin təmir müddətində sakinlərə yeraltı parkinqdən müvəqqəti ödənişsiz istifadə imkanı yaradıla bilərdi", - deyə şikayətdə bildirilib.
Məsələ ilə bağlı "Park Yasamal" yaşayış kompleksinin əməkdaşları ilə əlaqə saxladıq. Bildirildi ki, sözügedən parkinq sahələri yalnız oradakı ofislərə məxsusdur:
"Orada kirayə verilən ofislər var. Ola bilsin ki, həmin ərazilər onlara məxsus parkinq yerləridir. Ancaq sakinlər üçün binanın daxilində ödənişli yeraltı parkinq yeri var. İstəyənlər aylıq ödənişlə qarajda yer götürə bilərlər".
Həmçinin qeyd edilib ki, əraziyə qoyulan işarələr təmirlə bağlıdır:
"Orada ofislər var ki, daxilində təmir işləri aparılır. Bununla əlaqədar ora ustalar gəlir-gedir. Həmin ərazilərdə də onlar avtomobillərini saxlayır, bundan əlavə, yük maşınları gəlir. Binaların qarşısındakı sözügedən parkinq yerləri gələcəkdə çox böyük ehtimalla olmayacaq. Bəziləri qalacaq ki, onlar da binanın qarşısında yerləşən ofislər, marketlər və ya digər əmlak şirkətlərinə məxsus olacaq".
