"Qarabağ"ın sabiq polşalı müdafiəçisi Yakub Jezniçak "Sabah"ın Çempionlar Liqasının Liqa mərhələsinə tarixi vəsiqəsindən sonra Azərbaycan futbolu və Bakı klubunda çıxış edən həmyerlisi Timoteuş Puxaç haqqında danışıb.
Jezniçak Polşanın "WP SportoweFakty" nəşrinə müsahibəsində Azərbaycanda oynadığı dövrü xatırlayıb. O, 2017-ci ildə "Qarabağ"la Çempionlar Liqasına vəsiqə qazandıqları zaman Bakıda böyük coşqu yaşandığını bildirib və avrokubok matçlarında Olimpiya stadionunun tam dolduğunu qeyd edib.
İki dəfə Azərbaycan çempionu olan Jezniçak ölkədə futbolçular üzərində təzyiqin az olduğunu, klublarda işlərin sabit getdiyini və transferlərin düşünülmüş şəkildə həyata keçirildiyini deyib.
Polşalı futbolçu "Sabah"ın müdafiəçisi Timoteuş Puxaçın Azərbaycana transfer olunarkən tənqid edilməsini öz karyerası ilə müqayisə edib və həmyerlisinə dəstək verib: "Legiya"dan Bakıya gedəndə mənim haqqımda da çox şey deyirdilər. Timoteuşun da başına oxşar şey gəldi. Düşünürəm ki, indi peşman deyil".
Jezniçak Bakını "kiçik Dubay" adlandırıb. O, Puxaçın Bakıda rahat yaşamaq üçün hər şeyə sahib olduğunu, şəhərdə çox yaxşı restoranların və müasir yaşayış komplekslərinin olduğunu vurğulayıb.
Jezniçak "Sabah"ın son illərdə böyük inkişaf etdiyini də qeyd edib və komandanın artıq fərqli səviyyəyə yüksəldiyini bildirib.
Sabiq müdafiəçi sonda Puxaçın yenidən Polşa millisinin heyətinə çağırılmağa layiq olduğunu deyib: "Yaxşı formadadır və Çempionlar Liqasına vəsiqə qazanıb. Göstərdiklərindən sonra yığmaya qayıtmalıdır".
