Bakının Nərimanov rayonunda qadına qeyri-etik hərəkətlər edən şəxs həbs edilib.
Teleqraf.аz-ın əldə etdiyi xəbərə görə, hadisə rayonun Həsən Əliyev küçəsindəki marketdə baş verib.
Satıcı xanıma qarşı bir nəfər nalayiq ifadələr işlədərək onu təhqir edib. Dərhal marketə polis əməkdaşı yaxınlaşıb, həmin şəxs saxlanılıb.
Onun 1982-ci il təvəllüdlü Əmir Bağırov (ad-soyad şərti verilib – red.) olduğu aydınlaşdırılıb.
Məlum olub ki, Bağırov həmin xanıma qarşı kobud və qeyri-etik hərəkətlərə yol verib, onu narahat edib. Qız etiraz etdikdə isə onu təhqir edərək ictimai qaydanı pozub.
İş üzrə izahat verən Bağırovun sözlərinə görə, xanıma yaxınlaşmaqda pis məqsədi olmayıb: "Onunla tanış olmaq istədim. Daha sonra banan alıb ona yeməsi üçün təqdim etdim. Lakin heç bir nalayiq ifadə işlətmədim. Sadəcə banan yeməyi təklif etdim".
Bağırovun barəsində İnzibati Xətalar Məcəlləsinin 510-cu (xırda xuliqanlıq) maddəsi ilə ittiham elan edilib.
Nizami Rayon Məhkəməsinin qərarı ilə Bağırov 5 gün müddətinə inzibati qaydada həbs edilib.
