Abşeronda gənc oğlan sevgilisini qarət edib.
Hadisə Xırdalan şəhərində baş verib.
İttiham aktına görə, 25 yaşlı Firuz Quliyev (şərti adla) qeyri-rəsmi yaşadığı Nailənin (şərti adla) ümumilikdə 4900 manatlıq qızıllarını oğurlayıb. Zərərçəkənin şikayəti əsasında o saxlanılıb və barəsində cinayət işi açılıb.
Təqsirləndirilən şəxs bildirib ki, 2 il əvvəl Xaçmazda Nailənin evində kirayədə qalıb. Sonradan qadınla aralarında sevgi münasibətləri olub. Hadisə günü Nailəni mağazaya ərzaq almağa göndərib. Bu fürsətdən istifadə edərək, qızılları oğurlayıb. Oğurluq zinət əşyalarını metronun "Memar Əcəmi" stansiyası yaxınlığındakı univermaqda 1800 manata satıb. Pulu isə borclarına və şəxsi ehtiyaclarına xərcləyib.
Zərərçəkmiş şəxs isə ifadəsində bildirib ki, mağazadan qayıdanda qızıllarının oğurlandığını və 4 yaşlı oğlunun ağladığını görüb. Onun sözlərinə görə, Firuza mesaj yazsa da, əlaqə saxlaya bilməyib. Məlum olub ki, Firuz onu "Whatsapp" və "TikTok"da "blok" edib. Nailə dəymiş ziyanın ödənilmədiyini deyərək, qızıllarının qaytarılmasını istəyib.
Məhkəmənin qərarı ilə F. Quliyev 3 il 17 gün müddətinə azadlıqdan məhrum edilib.
Mənbə: lent.аz
