Bu gün mərhum meyxanaçı və şair Vüqar Biləcərinin doğum günüdür.
Vüqar Zakir oğlu Paşayev 24 avqust 1988-ci ildə Bakıda anadan olub. "Biləcəri" təxəllüsü ilə tanınan sənətçi əslən Hökməli kəndindən olub. Uşaqlıq və yeniyetməlik illərində güləşlə məşğul olan Vüqar sonradan ədəbiyyata böyük maraq göstərib. Xüsusilə Məhəmməd Füzulinin yaradıcılığı onun dünyagörüşündə və yaradıcılığında mühüm yer tutub.
O, 2004-cü ildə "De, Gəlsin!" meyxana yarışması ilə geniş auditoriyada tanınıb. Əruz vəznində qəzəlləri, dini mövzulu şeirləri və özünəməxsus ifa tərzi ilə seçilib. Azərbaycan Dövlət Mədəniyyət və İncəsənət Universitetində təhsil alıb.
Vüqar Biləcərinin yaradıcılığında nakam sevgi mövzusu da xüsusi yer tutub. Onun sevgi ilə bağlı şeirlərinin və qəzəllərinin bir qisminin yaşadığı uğursuz sevgi hekayəsindən təsirlənərək yazıldığı bildirilir. Bu səbəbdən o, yaradıcılığında sevgi, ayrılıq və həsrət mövzularına tez-tez müraciət edib.
Vüqar Biləcəri 29 avqust 2020-ci ildə, 32 yaşında vəfat edib. O, qısa ömrünə baxmayaraq, meyxana və qəzəl sənətində özünəməxsus iz qoymağı bacarıb.
