Siqaret qaçaqmalçılığı ilə bağlı açılmış cinayət işi üzrə daha 2 nəfər həbs olunub.
Bakuplus.az Baş Prokurorluğa istinadən xəbər verir ki, Gürcüstana qaçmış və beynəlxalq axtarışa verilmiş iki şəxs ölkəmizə ekstradisiya edilib.
Belə ki, Əbülfət Həsən oğlu İsmayılzadə və Amal Sarvan oğlu Əzizovun ekstradisiyaları haqqında Baş Prokurorluğun vəsatətləri Gürcüstanın Ədliyyə Nazirliyi tərəfindən təmin edilib.
Həmin şəxslərin Azərbaycan Respublikası Cinayət Məcəlləsinin müvafiq maddələrində nəzərdə tutulmuş cinayət əməllərini törətmələrinə əsaslı şübhələr müəyyən edildiyindən barələrində təqsirləndirilən şəxs qismində cəlbetmə haqqında qərarlar qəbul olunub və istintaqdan qaçıb gizləndiklərinə görə onlar beynəlxalq axtarışa veriliblər.
Qeyd olunan şəxslər Gürcüstan ərazisində saxlanılaraq Ədliyyə Nazirliyi Penitensiar Xidmətinin xüsusi konvoyunun müşayiəti ilə Azərbaycana gətiriliblər.
Xatırladaq ki, cinayət işi üzrə xeyli vəzifəli şəxs həbs edilib və ya işdən çıxarılıb. Onların arasında gömrükçülər, sərhədçilər, dənizçilər və digər şəxslər var.
