Bakı Apellyasiya Məhkəməsində qəsdən sağlamlığa ağır zərər vurmada təqsirləndirilən Amil Hacızadə barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim İbrahim İbrahimlinin sədrliyi ilə keçirilən prosesdə qərar elan olunub.
Qərara əsasən, onun apellyasiya şikayəti təmin edilməyib.
İttihama görə, hadisə 6 oktyabr 2024-cü il tarixdə, saat 23 radələrində Bakı şəhəri Suraxanı rayonu, Bəhruz Kəngərli küçəsində yerləşən "Həsənoğlu market"in qarşısında qeydə alınıb.
Amil Hacızadə ilə həmin mağazanın sahibi olan qonşusu, zərərçəkmiş Zamiq Əsədov arasında mübahisə yaranıb. Amil market sahibinə xəsarətlər yetirib.
Təqsirləndirilən şəxs idarə etdiyi "VAZ-2104" markalı avtomobillə mağazanın qarşısından keçərkən zərərçəkmiş şəxsin söyüş söyməsini eşidib. Bu səbəblə tərəflər arasında mübahisə yaranıb, mübahisə davaya çevrilib, Amil Zamiqin sol qulağını dişləyərək qoparıb.
Bundan sonra təqsirləndirilən şəxs dəmir parçası ilə zərərçəkmiş şəxsin bədəninin müxtəlif nahiyələrinə bir neçə zərbə endirərək ona xəsarət yetirib.
Hadisədən sonra Amil Hacızadə saxlanılaraq cinayət məsuliyyətinə cəlb edilib.
Bakı Ağır Cinayətlər Məhkəməsinin hökmü ilə təqsirləndirilən şəxs 3 il 5 ay 29 gün müddətə azadlıqdan məhrum edilib və o, məhkəmə iclas zalında həbsə edilib.
