Abşeron Rayon Məhkəməsində qəsdən sağlamlığa yüngül zərər vurmada təqsirləndirilən Zahid Xəlilzadənin cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Firuzə Kərimovanın sədrliyi ilə keçirilən prosesdə hökm oxunub.
İttiham aktına əsasən, Zahid Xəlilzadə 2025-ci il tarixdə saat 18 radələrində taksi fəaliyyəti ilə məşğul olduğu avtomobil ilə Sumqayıt şəhərindən sərnişin götürərək Bakı-Sumqayıt şose yolu ilə paytaxt ərazisi istiqamətində hərəkət edib. Sürücü köməkçi yoldan istifadə etdiyinə görə sərnişin narazılıq edib. Sürücünün kobud danişması və davranışı səbəbindən tərəflər arasında mübahisə yaranıb. Bu zaman təqsirləndirilən şəxs avtomobili Masazır dairəsinə yaxın ərazidə saxlayaraq sərnişini nəqliyyat vasitəsindən düşürüb və ona fiziki zor tətbiq edib. Zahid zərərçəkmiş şəxsə yumruqla sifət nahiyəsindən, ayaqla isə müxtəlif nahiyələrindən zərbələr endirərək onu yerə yıxıb.
Təqsirləndirilən şəxs Cinayət Məcəlləsinin qəsdən sağlamlığa yüngül zərər vurma maddəsi ilə nəzərdə tutulmuş cinayət əməlini törətməkdə ittiham olunub.
Məhkəmənin hökmü ilə "Konstitusiya və Suverenlik İli" münasibətilə amnistiya elan edilməsi haqqında Milli Məclisin 19 dekabr 2025-ci il tarixli qərarının müvafiq maddəsi tətbiq edilməklə təqsirləndirilən şəxs cinayət məsuliyyətindən azad edilib.
