Bakıda taksi fəaliyyəti ilə məşğul olan 1964-cü il təvəllüdlü B.H. xırda xuliqanlıqda təqsirli bilinərək 15 gün müddətinə inzibati həbs edilib.
Hadisə ilə bağlı məhkəmə araşdırması zamanı maraqlı detallar üzə çıxıb.
İş materiallarına görə, hadisə 2026-cı ildə baş verib. Taksi sürücüsü ilə xarici vətəndaşlar olan müştərilər arasında gediş haqqı və kondisionerdən istifadə ilə bağlı narazılıq yaranıb.
Xarici vətəndaş Asad Arif tərəfindən Azərbaycanın Daxili İşlər Nazirliyinə, Rəqəmsal İnkişaf və Nəqliyyat Nazirliyinə və Dövlət Turizm Agentliyinə ünvanlanan şikayətdə bildirilir ki, sürücü əvvəlcə yüksək gediş haqqı tələb edib. Daha sonra kondisionerin işə salınması üçün əlavə pul istəyib.
Şikayətçinin sözlərinə görə, onlar səfəri davam etdirmək istəmədiklərini bildirərək avtomobildən düşmək istəyiblər. Lakin sürücü avtomobilin qapılarını kilidləyərək onların düşməsinə imkan verməyib və söyüş söyüb.
B.H. isə məhkəmədə ittihamı qəbul etməyib. O bildirib ki, həmin şəxslərdən 10 manat gediş haqqı istəyib, lakin onlar daha ucuz qiymətə getmək istəyiblər. Avtomobilin kondisionerinin işləmədiyini deyən sürücü sərnişinlərin narazı qaldığını və avtomobili saxlatdıraraq düşdüklərini bildirib.
B.H. onların avtomobildə cəmi 2-3 dəqiqə olduqlarını, heç bir mübahisə yaşanmadığını və sərnişinlərdən pul almadığını söyləyib.
Məhkəmə isə xarici vətəndaşın şikayətini, polis əməkdaşının izahatını və digər materialları birlikdə qiymətləndirərək B.H.-nin hərəkətlərinin İnzibati Xətalar Məcəlləsinin 510.1-ci maddəsində nəzərdə tutulan xırda xuliqanlıq əlamətlərinə uyğun olduğu qənaətinə gəlib.
Məhkəmə B.H.-yə cərimənin deyil, inzibati həbsin tətbiq edilməsini məqsədəuyğun sayıb və onu 15 gün müddətinə inzibati həbs edib.
Mənbə: qaynarinfo.az
