Abşeron Rayon Məhkəməsində qəsdən sağlamlığa yüngül zərər vurmada təqsirləndirilən Baba Nəbiyevin cinayət işi üzrə məhkəmə istintaqı yekunlaşıb.
Hakim Vaqif Həsənovun sədrliyi ilə keçirilən prosesdə hökm oxunub.
İttihama görə, hadisə Abşeron rayonu, Xırdalan şəhərində yerləşən yaşayış kompleksində baş verib.
1989-cu il təvəllüdlü Baba Nəbiyev ailəsi ilə birlikdə yaşadığı mənzildə həyat yoldaşı, zərərçəkmiş Fəridə Nəbiyevanın istifadə etdiyi mobil telefona gələn zənglərə cavab verməməsindən şübhələnərək bunun səbəbini soruşub. Bu zaman tərəflər arasında qısqanclıq və ailə-məişət münasibətləri zəminində mübahisə yaranıb. Mübahisə zamanı təqsirləndirilən şəxs əsəbiləşərək arvadının üzərinə hücum edib, ona əl və yumruq zərbələri endirib. Zərbələr nəticəsində qadının sifət, baş, sinə, qol və bədəninin müxtəlif nahiyələrinə xəsarətlər yetirilib.
Məhkəmədə təqsirləndirilən şəxs əməlindən peşman olduğunu, zərərçəkmiş şəxslə barışdıqlarını bildirərək cinayət işinə xitam verilməsini xahiş edib. Zərərçəkmiş şəxs təqsirləndirilən şəxslə barışdıqlarını bildirib. O qeyd edib ki, artıq ərinə qarşı heç bir maddi və mənəvi tələbi yoxdur, aralarındakı mübahisə tam həll edilib və vurulmuş ziyan tam ödənilib.
Məhkəmənin hökmü ilə icraat materialına xitam verilib və o, cinayət məsuliyyətindən azad edilib.
Qeyd edək ki, ad və soyadlar şərti verilib.
Mənbə: pravda.az
