Abşeron Rayon Məhkəməsində həyat yoldaşına qəsdən yüngül xəsarət yetirməkdə təqsirləndirilən Aqil Əmirovun (adı, soyadı şərtidir) cinayət işinə xitam verilib və o, cinayət məsuliyyətindən azad edilib.
İttihama görə, hadisə Xırdalandakı "Misir parkı" ərazisində baş verib.
Aqil həyat yoldaşını telefonuna gecə saatlarında gələn SMS-əa görə qısqanıb. Ertəsi gün parkda söhbət zamanı həmin mesaj barəsində yenidən soruşub. Qadının "Əcəb edirəm" cavabından əsəbiləşən kişi onun saçından tutaraq dartıb, sifətinə yumruq vurub, yerə yıxıldıqdan sonra isə təpiklə vurub.
Ekspertiza qadında üz və göz nahiyəsində qançırlar, gözə qansızma və əl barmağında xəsarətlər müəyyən edib. Bu xəsarətlər sağlamlığın qısa müddətə pozulmasına səbəb olan yüngül bədən xəsarətləri kimi qiymətləndirilib.
Təqsirləndirilən şəxs məhkəmədə əməlindən peşman olduğunu bildirib, hadisənin emosional vəziyyətdə baş verdiyini deyib. O, zərəri tam ödədiyini və həyat yoldaşı ilə barışdığını qeyd edib.
Zərərçəkmiş qadın da əri ilə barışdığını, ona qarşı heç bir şikayətinin olmadığını bildirərək cinayət işinə xitam verilməsini istəyib. Məhkəmə də bu xahişi təmin edib.
mənbə: pravda.az
